التضحية فى الترام

لو كنت اسكندرانى فمش حتستغرب وجود كلمة "ترام" –وبالذات الساعة اتنين وقت خروج المدارس والشغل- مع كلمة "تضحية"..

بس الترام كلو كوم وعربية الستات كوم تانى خالص ....

نبتدى بوصول الترام للمحطة واندفاع سيدة بعيالها الاربعة ناحية الترام المتحرك لتحصل على الجائزة الاولى فى ركوب الترام قبل نزول الناس التانية منه ..

ودا مش حيحصل الا فى وجود قليل من الشد والجذب والاقلام اللى تقريبا باخدها على دماغى عشان اوسعلها الطريق....

دا حتى البيبى اللى شايلاه على ايديها ممكن يتف علي الناس لعرقلتهم عن النزول من الترام قبل ركوبها...

ومع نجاحها فى الركوب ونجاح غيرها فى النزول ..اذ انا ارتقى اول درجات سلم الترام مع صوت عالى يطيح بأذنى قائلا"رايحة فين يا حبيبتشى الترام اتملى يا ماما ..انتى عايزة تزنقينا؟؟؟؟"

ومع تجاهلى لهذا الكلام المباشر لوجود فراغ فى الترام ووجود تأخير فى ميعاد الدرس....قررت اطلع الترام غصب عن عينيها...ويا ريتنى ما طلعت

دفعة قوية من كوع احدى السيدات تكفى لتدفعنى من فوق برج ايفل والسبب كما يقال "معلش يا بنتى اصل بطلع الروبع جنيه م الشنطة"

مع وجود دفعات اخرى لعدة سيدات يتسابقن للجلوس على كرسى العرش اااااا قصدى الترام....

ومع كثرة التزاحم وعدم احساسك بصوباع رجلك الكبير تلاحظ وجود كائن غريب ...

سيدة ترتدى حقيبة شبه فارغة وكيس صغير فى يدها والنظارة الشمسية تحجب عينيها والطرحة من غير دبابيس وتقحم يدها فى حقيبة اخرى ولكنها فى الحقيقة حقيبة الست اللى ادامها .....تقدر تفتح بؤك؟؟؟؟؟؟ دى مش لوحدها صدقنى

ومع اكتشاف احدى السيدات ان بوكها اتسرق بالمية جنيه اللى جواه ومع اتهامها لواحدة اخرى تقف وراءها تبدأ تشتم وتزعق .....

ومع ملاحظة الكمسرى لاحدى المتسللات من دفع الاجرة فيبتدى يشتم ويزعق...

وتدافع الست عن حقها فتشتم وتزعق..

ومع صياح الاطفال ونزاعهم للوقوف عند الشباك....

 وبكاء الرضع وضحك الفتيات واغنية اليسا اللى واحدة مولعاها بصوت عالى عشان تسمعها لصاحبتها اللى واقفة على المحطة ......

ومن اول دمعة تنزل من عينى نظرا لبشاعة الرائحة ,وعدم قدرتى على التنفس لوجود حقيبة سيدة ما فوق حجابى الحاجز......وجذب الحجة لطرحتى مع كل وقفة ترام لعدم قدرتها على الاتزان مع حركة الترام ومع الكح والعطس حتى ان 99.9 % من الجراثيم اصبحت تغطينى وحتى ديتول مش حيعرف يشيلهم...

انزل من الترام واضحى بمكانى فى سبيل الجرى عشان الدرس ابتدى

.....اه والله

يا عزيزى اننا لمختلفون

أنا وحدى..

الكل يعتقد بأن وجهه هو الاجمل ..هو الاقوى ...والامثل

ايعد هذا اختلافا ؟؟؟؟

واى اختلافا يأتى من تشابه؟؟؟

أأنا وحدى فعلا ؟؟؟

 ام انا فريد من نوعى كباقى البشر؟؟؟

لا استطيع ان اعترف ان وجهى ليس الوحيد...لأنى مازلت ارى اختلافا فيه 

لما ارى اختلافا فى وجهى...وغيرى لا يراه؟؟؟

أوجهى كباقى الوجوه

لا الانف يختلف ولا الشفاه تتغير...وعيوننا سواء....؟؟؟

لما ما زلت ارانى مختلفة؟؟

..اذن فهى الروح..

...الآن فهمت...

انا الوحيدة القادرة على فهم روحى لذا ارانى مختلفة اما غيرى لا اشعر بروحهم ...أراهم سواء تماما كما يرونى..

جميعنا وجوه لعملة واحدة وهى الحياة...وما اعطته لك الحياة يظهر فى روحك وليس قطعة الجلد التى تدعى وجهك...او بالمعنى الاصح ..قناعك..

وعلى الرغم من اقتناعى قبل ذلك ان لكل وجه اختلافه

 الا ان الزمن يريد ان يقنعنى بأى وسيلة ان الكل سواء...

.الكل سواء فى الاختلاف...

مازلت وحدى...

يا اخد القرد على ماله

للاسف وعلى الرغم ان احنا  مقدرين الدنيا ومتمسكين تمسكا قويا بيها الا ان احنا مش مقدرين نفسنا ولا مقدرين غيرنا...

كل واحد اتخلق وليه قيمته ووجوده ووظيفته ...حتى لو كان عاطل

محدش فينا عالى ومحدش فينا قليل ..الفرق الوحيد بيكون فى مقدار الجهد اللى بنبذله فى حياتنا ولديننا..

انت بتعمل اللى بتقدر عليه وتسيب الباقى على ربنا واللى ربنا كاتبه هو اللى حيكون ليك يعنى نصيبك مكتوبلك ...

مفيش حد فينا بيقدر المكان او الوظيفة اللى ربنا حطه فيها او العيلة والصحاب اللى ربنا كتب انه يكون منهم ...ودا يطلق عليه ضعف الايمان

محدش بيقدر نفسه ويعرف حتى لو الدنيا متخبطة معاه فربنا خلقه عشان يفرح قلب حد ويطمن حد تانى ويعرف رغم وجوده هو بالذات الكوكب دا كان ممكن يحصل فيه خلل-sorry دى وسعت شوية- ....اقصد يعنى انت ليك لازمة 

من الاخر ...

ياما جابوا سيرة القرد وفلوسه...ما يعرفوش ان القرد ليه قلب تبوسه

وفيها ايه لو يوم راحت فلوسه..ما القرد حلو بس الكبير بيدوسه

#قدر_تتقدر

http://ask.fm/MayaShalabie

https://www.facebook.com/3btMasry?ref_type=bookmark

ملكش دعوة

ملكيش دعوة" دى تانى اكتر جملة بكرهها بعد جملة " انا كدا"

"ملكيش دعوة " انا سمعتها الاسبوع دا اكتر من الف مرة ومتسألونيش ازاى....

فى الوقت اللى بتنصح فيه اخوك او اختك نصيحة مهمة وفى نص الكلام يقولوا "ملكش دعوة"....

بتحس انك عايز تنفجر فيهم وبتبقى الجملة دى بالنسبة ليا "القشاية اللى قطمت ضهر الحمار"..ااا...اقصد ..."القشة التى قصمت ظهر البعير"...

الجملة دى بتألم اوى لو كانت نيتك خير..بتحس ساعتها انك ملكش لازمة او انك بالنسبة ليهم مش موجود فى الوجود...

انا بقى اتبعت اسلوب عكسى مع الجملة دى ..يعنى لو حد قالى ملكيش دعوة بفضل ازود فى النصيحة لحد ما يتبعها او يدينى بالقلم ايهما اقرب ....

انا حعلم نفسى ما ازعلش لو حد قالى الكلمة دى لانى حبقى متـأكدة ان انا حفضل انصح وهو حيتفبل النصيحة شاء ..ام أبى..

الخلاصة يا سادة ....

كلنا لينا من بعض ..انت مش عايش لوحدك وربنا مش خلقك لوحدك..فيا تتقبل النقد ..يا تتكتم خالص وبلاش "ملكوش دعوة" اللى انت معلق عليها دى..اصل الحق ما يزعلش حد

 http://ask.fm/MayaShalabie  

#لكى_الله_ياغزة

كنت ناوية النهاردة اكتب عن موضوع تانى خالص بس الظروف اللى حوالينا بتجبرك انك متفكرش فى حاجة

قريت من شوية ان وصل عدد الشهداء فى غزة الى اكثر من 100 شهيد واغلبهم من الاطفال

اللى بيحصل فى غزة دا بسببنا احنا ..ايوة احنا ...طول عمرنا عايشين وساكتين ومش عارفة حنفضل لحد امتى كدا ؟؟؟؟ 

النت مليان صورلبيوت محروقة واطفال مقتولة ومناظر بشعة وللاسف محدش بيتحرك ولا بيعمل حاجة..

لا حكومة بتساعد ولا جيش بيتحرك ولا حد بيعارض ...فين داعش وصوتها العالى واللى عملته خليفة المسلمين ؟؟فين حماس ؟؟ فين السعودية بلد الاسلام ؟ احنا فين؟؟؟؟ مسافة السكة فين ؟؟ها؟؟

لا انا ولا انت حنقدر نعمل حاجة لوحدنا ..

ممكن كل اللى نقدر نعمله ان احنا ندعيلهم يثبتهم الله على الحق ويرحم امواتهم ويشفى جرحاهم...

 وانا بقول كدا لان فى ناس بقى عندها تبلد فى المشاعر..تحس ان الانسانية ماتت منها على اساس ان احنا مش حنموت موتتهم..

#لكى_الله_ياغزة

#حسبى_الله_ونعم_الوكيل

رمضان كريم

مفيش موضوع فى دماغى حاليا-عشان الصيام وكدا بقى يعنى- فقولت اهى فرصة اعيد عليكوا ....اااا ..قصدى ارمضن عليكوا ...

كل سنة وانتوا طيبين..

حس بكل عطش وكل جوع...حس بكل صلاة وصيام ...حس بكل فرحة من اهلك وكل ابتسامة..

ادعى لكل سجين يفك كربه ...ولكل مظلوم ينصر حقه..

اترحم على اللى ماتوا واللى بيموتوا واللى حيموتوا ..وادعى ليهم بالعفو والمغفرة...

كل اللى نفسك يبقى قلبك عليه طول السنة اعمله فى الشهر دا يمكن تتعود عليه ولا حاجة J

رمضان كريم ...وكل سنة وانتوا طيبين

ااه..قبل ما انسى..فى ملحوظة ...

اما تيجى تتعارك ولا حاجة..."اللهم انى صائم" بتتقال بدل الشتيمة مش بعد الشتيمة..

وابوس رجلك ما تتعاركش من اساسا...

why do we all need to cry ??

وكالعادة لقيت ورق قديم مرمى فى اخر الدرج-معلش ورقى كتير اوى دا انت حتى ممكن تلاقى ورق تحت السرير "سبحان الله"- وانا بشوفه لقيت ورقة كبيرة عريضة وكاتبة فيها سؤال ..

والسؤال كان ""why do we all need to cry??

الورقة من 2010 ....كان عندى ساعتها 13 سنة ...انا مش مستغربة من التوقيت لان 2010 دى السنة اللى تلت سنة وفاة بابا فاكيد موضوع العياط كان شئ مرغوب بالنسبة ليا ...

اللى انا مستغرباه اكتر ان كتير مننا محتاج اوى يعيط وعشان اتأكد من كدا اخترت عينة عشوائية من ask.fm وسألتهم نفس السؤال ....

والحمد لله مش انا لوحدى اللى عايزة اعيط ...والاغلب اتفق على كلمة واحدة بس وهى "الراحة" ....

كلنا عايزين نعيط عشان نرتاح مش لازم يكون فيه سبب عشان تعيط بالليل قبل النوم ...او تقفل عليك باب الاوضة وتنهمر الدموع

كلنا كارهين العياط بس كلنا محتاجينه ...ليه؟؟؟

والغريب ان الورقة دى انا كاتبة فيها الاجابة

والاجابة بتقول"In life,there are things we don't need it but we just need to feel it"

يعنى احنا بنحب نحس بالالم يمكن عشان الالم بيحسسنا ان احنا عايشين...

اى حاجة بتألم فى الحياة متزعلش انها وجعتك اوى او اذتك ..حس بيها وبكل لحظة فيها لانك بعدها بتكون اقوى..ودا نفس السبب اللى بيخلينا محتاجين نعيط

يعنى لاحظ نفسك بعد كل دمعة بتنزل من عينيك وكل نفس طويل بتاخده بتحس مشاكلك بدأت تبقى اوضح ....غضبك بيقل –ودا عين العقل الصراحة-....

الخلاصة من الموضوع..

الكلام مش بس ع العياط الكلام على كل حاجة بتألم وبتوجع ....متزعلش من الم ووجع ..لان دا بنزين حياتك...

http://ask.fm/MayaShalabie

افتح شباكك

النهارده مش حكتب عن موضوع معين انا بس حتكلم عن احساس معين حسيت بيه النهاردة وبقوة.....

 انا معرفش اسم الاحساس دا ايه ولا بحس بيه ازاى بس انا حوصفه شوية..

الاحساس اللى بتحس بيه لما تبدأ تفتح الشباك الصبح فتحة صغيرة وانت لسة قايم من النوم واشعة الشمس تدخل على خفيف من فتحات الشباك وتوصل لعينيك لدرجة تخليك زى الاعمى كدا وتفضل واقف مبتعملش اى حاجة الا انك تفضل واقف وباصص على اشعة الشمس والنور اللى جاى على عينيك...... انا مش عارفة اوصف الاحساس كويس بس هو احساس حلو اوى

فى الخمس دقايق دول ...

بتحس انك ملكت الدنيا لوحدك ....

بتحس ان دماغك فضت من اى مشكلة واى غم و اى تعب....

بتحس ان كل حاجة مش ناقصها اى حاجة......

بتحس انك بتبتسم لاارادى ...ومن غير ما تعرف السبب

بتحس بالهدوء التام –الا اذا كنت ساكن ادام عمارة بتتبنى او شجرة كبيرة عصافيرها مش راضية تبطل زقزقة- ......

لو اى حد بيحس بالاحساس دا يا ريت يقول احسن انا حاسة ان انا اتجنيت http://ask.fm/MayaShalabie 

العوم الكلابى

تعريف "العوم الكلابى" : هو الطريقة اللى بتستخدمها اما تنزل المية وفاكر نفسك سباح بس للاسف بتلطش فيها.... وبغرض النجاة منها تفضل تحرك رجليك وايديك بحركات غير منظمة وغير متسقة عشان يفضل وشك فوق سطح المية وما تغرقش...بس ...مش هوا دا العوم الكلابى اللى انا عايزاه ...

لو بصيت لنفسك ولاهلك وليا وللناس فى الشارع حتلاقى كل واحد مش عارف هو بيعمل ايه ؟؟ ولا عايز ايه؟؟ وليه ماشى فى طريقه من اساسا؟؟

ونفضل نودى نفسنا فى طرق وسكك مش مفهومة ومش متركبة على بعضيها على امل ايجاد الهوية والهدف وكأننا بنعوم عوم كلابى فى الدنيا وبنفضل تايهين كدا طول حياتنا واما بنحس اننا لاقينا السكة الصح بنرجع ونلف ونتوه تانى ....

دور على طريقك وسكة حياتك اللى حتبعدك عن الحيرة والتوهان ويبعدك عن التلطيش فى المية..اااااا...قصدى الدنيا ..

ولو فاكر ان حيرتك وتوهانك هى اللى حتنقذك فمسير ايديك ورجليك يتعبوا من التلطيش ...وتغرق...

الخلاصة من كل دا يا سادة:..

ان ما ترميش نفسك فى الف سكة وسكة ..ولو حاسس نفسك تايه ومش عارف هدفك ...فكر..وفكر تانى واتوكل ع الله لطريقك الصح ...مع العلم ان طريقك الصح دا ممكن يكون كذا حاجة على بعضيها "اهلك ..احبابك..مستقبلك..دراستك..دينك وقلبك.."

ملحوظة صغيرةعلى الرغم من وجود من يستخدمون العوم الكلابى فى الدنيا ..ففى السباحين وسباحين شاطرين اوى كمان ....ربنا يهدينا زيهم J

 :)http://ask.fm/MayaShalabie

التفكير فى اللامعقول

كلنا بنفكر...وكلنا بنتمنى حاجات غريبة عمرها ما حتحصل او ممكن تحصل بس على بعد ملايين السنين الضوئية J

يعنى قبل ما تنام بليل تفضل مبحلق فى السقف برضو-ما تفهمش ايه علاقة السقف بالافكار"سبحان الله"-بتفضل تفكر فى شخص معين بتحبه –او مش طايقه- او ممكن تفكر فى منصب عالى-عالى عالى يعنى- ممكن توصله بس بعد ما تقوم الحرب العالمية الرابعة باذن الله :P

ولو بتسأل نفسك كتير انت ليه بتفكر كدا فدا حيكون اجابته "الامتاع الذهنى"...يعنى الخمس دقايق قبل ما تغوص فى النوم او الساعتين اللى بتفضل ماشيهم فى صالة البيت رايح جاى والنور مقطوع والنت فاصل بتبقى احيانا اجمل لحظات حياتك .....

مع العلم ان احنا برضو بنفكر فى حاجات معقولة بنفكرفى مستقبل....فى شغل...فى دين...فى دنيا..فى علم...فى حياة....

يعنى محدش يستغل الكلمتين المكتوبين فوق ويعوم فى اللامعقول ويسيب ارض المعقول ...

واحب اقول كلمتين ع الماشى ان :

مفيش حد مش بيفكر...مفيش حد مش بيتمنى

كلنا بنفكر فى كل حاجة وبنتمنى كل حاجة وربنا بيحطلنا الاصلح فى حياتنا فاعمل اللى عليك وسيب الباقى على ربنا...

ملحوظة صغيرة...

الكلام دا ن تجربة حياتية يعنى انا برضو بفكر فى اللامعقول...انا نفسى ابقى رائدة فضاء مع ان انا بخاف جدا من المرتفعات ....نفسى اركب موتوسيكل بسرعة جنونية بس اكون لابسة الخوذة-الواحد مش ضامن عمره برضو-.....نفسى ابقى جراحة مشهورة اوى بس ساعتها يكون عندى عشرين سنة بس ما تفهمش ازاى...ونفسى...ونفسى....ونفسى......

الصاحب اللى تتمسك بيه والصاحب اللى ترميه فى مدونتك

بناء على طلب الجماهير الحاشدة انا قررت اكتب الموضوع دا .....اااااااا......احم .....هو الصراحة شخص واحد على ask.fm اللى طلب الموضوع دا J

فى نظرى الصاحب اللى تتمسك بيه هو الصاحب اللى يحكيلك عن اى حاجة فى حياتة او مع عيلته من غير ما يتكسف منك او يحس بخجل وفى نفس الوقت انت تقدر تقوله على اسرارك اللى فى حياتك من غير ما تحس انك متضايق او متوتر من ردة فعله ومش حتندم على حاجة عملتها معاه او قولتهاله يعنى يكون واحد ترتاح معاه ويرتاح معاك ....

هوالصاحب اللى يقولك عن مشاكله بهدف طلب حل او بهدف الفضفضة مش زى بعض الناس اللى يحسسوك انهم بيحكولك مشاكلهم عشان يبينوا ان حياتك احسن من حياتهم وانهم-يا عينى-شايفين الذل على اخره........

اما بقى الصاحب اللى حترميه فى مدونتك فهو اكيد شخص انت بتهتم بيه -لان غير كدا دا يبقى مش صاحبك اساسا-ونفسك هو يستجيب لنصايحك عشان انت نفسك يبقى انسان احسن من اللى انت شايفه.... نفسك ترتاح معاه وانت بتكلمه ويستريح معاك وهو بيكلمك فبتضطر ترميه فى اقرب مدونة عندك بس للاسف مبيفهمش برضو.....

دا كان رأى بسيط عن الموضوع دا واتمنى يعجب اللى طلبه واللى عايز اى موضوع اكتب عنه يبعتلى على http://ask.fm/MayaShalabie بس يا ريت بلاش مواضيع صعبة ..دا انا غلباااااااااااااااااانة L

فضفضة قصيرة

وانا قاعدة بقرأ سورة الكهف لفتتنى اية بتقول:"قل هل ننبئكم بالاخسرين اعمالا, الذين ضل سعيهم فى الحياة الدنيا وهم يحسبون انهم يحسنون صنعا"

هل من الممكن ان الاية دى بتتكلم عليا او عليكى او عليك ...يعنى الواحد شايف نفسه انه كدا ماشى على الطريق الصحيح فى الدنيا بس فى نفس الوقت اما تفكر فيها الواحد طول حياته معملش حاجة عدلة  .....

يعنى مثلا رمضان هو الشهر الوحيد اللى الواحد بيختم فيه القران ...طيب نفرض لو معشناش لاخرة رمضان ؟؟؟انا شايفاها عيب اوى علينا ...مننظرنا sorry  اوى
دا بصراحة اللى كان خانقنى
وقولت افضفض بدل ما كل الناس بتفضفضلى وانا مش بفضفض لحد

"اللهم انك عفو تحب العفو فاعفو عنا واغفر لنا"