وقفة

وقفت....وقفت ولا تدري ما الذي اوقفها اهي الحياة ام رائحة طاجن البامية التي تعشقها !!

وقفت ....الجميع يتحرك وهي واقفة....الجميع يقفز وهي واقفة...الجميع يشعر وهي واقفة

تريد ان تدمع لكن تخشي ان تختلط الدموع بالايلاينر فتبدو كمصاص دماء قد بعث من جديد
لا تريد ان تضحك....ولماذا تضحك!! بل....لماذا لا تضحك؟! كل شئ اصبح تحت قدميها وان لم يكن في يدها...لماذا لا تضحك والجميع بتحرك ويشعر ويقفز؟!

لا تريد ان تقفز ولا ان تتحرك..... ولكنها تشعر....نعم تشعر رغم رغبتها في عدم الشعور......

فالشكل ثابت والجوف بركان 

السنتر

طبعا لسة خارجة من ثانوية عامة.... وانتوا عارفين يعنى ايه ثانوية عامة ...يعنى دروس....يعنى سناتر ....يعنى ميت ميت

ولفيت على دروس كتيييير وسناتر اكتر...

بس السنتر اللى حيفضل طول عمرى معلم عليا..اااا قصدى فى دماغى يعنى ....هو سنتر مستر/.......

ونبدأ بدخول شارع لا تدرى اهو ضيق ؟؟؟ ام يضيق بمن به من عمال البناء والبلدوزرات؟؟؟؟

على يمينك مبنى قصير- ولكن مع الوقت حيطول ما تقلقش لسة بيتبنى-

وتبدأ بصعود درجات السلم درجة اه ..ودرجة لأ ..ليس لعبا منك ولكن فى الواقع درجات السلم مفرغة درجة موجودة ودرجة غير موجودة .

وتصل اخيرا للدرجات الرئيسية للسنتر درجات ناعمة ملساء حتى لتكاد ترى قدميك فى الهواء من الشقلطة اللى حتتشقلطها...

اخفض رأسك سريعا...هناك..اااا فى الواقع لا ادرى ما هناك؟؟ فى الاغلب حائط ولكن يكاد يطيح برأسك..

وتستمر فى الصعود واخيرا تصل للسنتر....

ومن الداخل فى رأيى مصروف عليه اكثر من اللازم ..اسند بيدك على الحائط ولكن لن تجده حائط عادى وانما كله من السيراميك من اعلاه لاسفله ....ومكتب صغير ولكن شيك فى مواجهتك وتستفسر عن مكان القاعة ..ويا لهول الاجابة :"فى المطبخ" 

لا تستعجب كثيرا فقط ادخل المطبخ وتجاهل الترموس وكوبايات الشاى..

وتجد اخيرا القاعة ...والسيراميك يغطيها من شرقها لغربها..

تجلس ومهما كانت نحافتك فستظل تشعر بأن هذا الكرسى سينكسر بك فى وقت ما ...

ولكن بمرور الوقت استمع للشرح وحاول الا تفقد تركيزك مع كلام المستر الممزوج بغناء عمال البناء والات البلدوزر :"ركز فى الحتة دى اوى....ركز ... ركز....ركز"

ومع انتهاء الوقت ..تقف..تتجه للباب...تلقى نظرة على كوبايات الشاى ...تودع من يجلس على المكتب الشيك ...اتجه للسلم ...اخفض رأسك...درجة اه ودرجة لأ...اقتحم تجمعات عمال البناء واخيرا ودع الشارع الضيق- تقريبا- بمن فيه.

التضحية فى الترام

لو كنت اسكندرانى فمش حتستغرب وجود كلمة "ترام" –وبالذات الساعة اتنين وقت خروج المدارس والشغل- مع كلمة "تضحية"..

بس الترام كلو كوم وعربية الستات كوم تانى خالص ....

نبتدى بوصول الترام للمحطة واندفاع سيدة بعيالها الاربعة ناحية الترام المتحرك لتحصل على الجائزة الاولى فى ركوب الترام قبل نزول الناس التانية منه ..

ودا مش حيحصل الا فى وجود قليل من الشد والجذب والاقلام اللى تقريبا باخدها على دماغى عشان اوسعلها الطريق....

دا حتى البيبى اللى شايلاه على ايديها ممكن يتف علي الناس لعرقلتهم عن النزول من الترام قبل ركوبها...

ومع نجاحها فى الركوب ونجاح غيرها فى النزول ..اذ انا ارتقى اول درجات سلم الترام مع صوت عالى يطيح بأذنى قائلا"رايحة فين يا حبيبتشى الترام اتملى يا ماما ..انتى عايزة تزنقينا؟؟؟؟"

ومع تجاهلى لهذا الكلام المباشر لوجود فراغ فى الترام ووجود تأخير فى ميعاد الدرس....قررت اطلع الترام غصب عن عينيها...ويا ريتنى ما طلعت

دفعة قوية من كوع احدى السيدات تكفى لتدفعنى من فوق برج ايفل والسبب كما يقال "معلش يا بنتى اصل بطلع الروبع جنيه م الشنطة"

مع وجود دفعات اخرى لعدة سيدات يتسابقن للجلوس على كرسى العرش اااااا قصدى الترام....

ومع كثرة التزاحم وعدم احساسك بصوباع رجلك الكبير تلاحظ وجود كائن غريب ...

سيدة ترتدى حقيبة شبه فارغة وكيس صغير فى يدها والنظارة الشمسية تحجب عينيها والطرحة من غير دبابيس وتقحم يدها فى حقيبة اخرى ولكنها فى الحقيقة حقيبة الست اللى ادامها .....تقدر تفتح بؤك؟؟؟؟؟؟ دى مش لوحدها صدقنى

ومع اكتشاف احدى السيدات ان بوكها اتسرق بالمية جنيه اللى جواه ومع اتهامها لواحدة اخرى تقف وراءها تبدأ تشتم وتزعق .....

ومع ملاحظة الكمسرى لاحدى المتسللات من دفع الاجرة فيبتدى يشتم ويزعق...

وتدافع الست عن حقها فتشتم وتزعق..

ومع صياح الاطفال ونزاعهم للوقوف عند الشباك....

 وبكاء الرضع وضحك الفتيات واغنية اليسا اللى واحدة مولعاها بصوت عالى عشان تسمعها لصاحبتها اللى واقفة على المحطة ......

ومن اول دمعة تنزل من عينى نظرا لبشاعة الرائحة ,وعدم قدرتى على التنفس لوجود حقيبة سيدة ما فوق حجابى الحاجز......وجذب الحجة لطرحتى مع كل وقفة ترام لعدم قدرتها على الاتزان مع حركة الترام ومع الكح والعطس حتى ان 99.9 % من الجراثيم اصبحت تغطينى وحتى ديتول مش حيعرف يشيلهم...

انزل من الترام واضحى بمكانى فى سبيل الجرى عشان الدرس ابتدى

.....اه والله

يا عزيزى اننا لمختلفون

أنا وحدى..

الكل يعتقد بأن وجهه هو الاجمل ..هو الاقوى ...والامثل

ايعد هذا اختلافا ؟؟؟؟

واى اختلافا يأتى من تشابه؟؟؟

أأنا وحدى فعلا ؟؟؟

 ام انا فريد من نوعى كباقى البشر؟؟؟

لا استطيع ان اعترف ان وجهى ليس الوحيد...لأنى مازلت ارى اختلافا فيه 

لما ارى اختلافا فى وجهى...وغيرى لا يراه؟؟؟

أوجهى كباقى الوجوه

لا الانف يختلف ولا الشفاه تتغير...وعيوننا سواء....؟؟؟

لما ما زلت ارانى مختلفة؟؟

..اذن فهى الروح..

...الآن فهمت...

انا الوحيدة القادرة على فهم روحى لذا ارانى مختلفة اما غيرى لا اشعر بروحهم ...أراهم سواء تماما كما يرونى..

جميعنا وجوه لعملة واحدة وهى الحياة...وما اعطته لك الحياة يظهر فى روحك وليس قطعة الجلد التى تدعى وجهك...او بالمعنى الاصح ..قناعك..

وعلى الرغم من اقتناعى قبل ذلك ان لكل وجه اختلافه

 الا ان الزمن يريد ان يقنعنى بأى وسيلة ان الكل سواء...

.الكل سواء فى الاختلاف...

مازلت وحدى...

يا اخد القرد على ماله

للاسف وعلى الرغم ان احنا  مقدرين الدنيا ومتمسكين تمسكا قويا بيها الا ان احنا مش مقدرين نفسنا ولا مقدرين غيرنا...

كل واحد اتخلق وليه قيمته ووجوده ووظيفته ...حتى لو كان عاطل

محدش فينا عالى ومحدش فينا قليل ..الفرق الوحيد بيكون فى مقدار الجهد اللى بنبذله فى حياتنا ولديننا..

انت بتعمل اللى بتقدر عليه وتسيب الباقى على ربنا واللى ربنا كاتبه هو اللى حيكون ليك يعنى نصيبك مكتوبلك ...

مفيش حد فينا بيقدر المكان او الوظيفة اللى ربنا حطه فيها او العيلة والصحاب اللى ربنا كتب انه يكون منهم ...ودا يطلق عليه ضعف الايمان

محدش بيقدر نفسه ويعرف حتى لو الدنيا متخبطة معاه فربنا خلقه عشان يفرح قلب حد ويطمن حد تانى ويعرف رغم وجوده هو بالذات الكوكب دا كان ممكن يحصل فيه خلل-sorry دى وسعت شوية- ....اقصد يعنى انت ليك لازمة 

من الاخر ...

ياما جابوا سيرة القرد وفلوسه...ما يعرفوش ان القرد ليه قلب تبوسه

وفيها ايه لو يوم راحت فلوسه..ما القرد حلو بس الكبير بيدوسه

#قدر_تتقدر

http://ask.fm/MayaShalabie

https://www.facebook.com/3btMasry?ref_type=bookmark

ملكش دعوة

ملكيش دعوة" دى تانى اكتر جملة بكرهها بعد جملة " انا كدا"

"ملكيش دعوة " انا سمعتها الاسبوع دا اكتر من الف مرة ومتسألونيش ازاى....

فى الوقت اللى بتنصح فيه اخوك او اختك نصيحة مهمة وفى نص الكلام يقولوا "ملكش دعوة"....

بتحس انك عايز تنفجر فيهم وبتبقى الجملة دى بالنسبة ليا "القشاية اللى قطمت ضهر الحمار"..ااا...اقصد ..."القشة التى قصمت ظهر البعير"...

الجملة دى بتألم اوى لو كانت نيتك خير..بتحس ساعتها انك ملكش لازمة او انك بالنسبة ليهم مش موجود فى الوجود...

انا بقى اتبعت اسلوب عكسى مع الجملة دى ..يعنى لو حد قالى ملكيش دعوة بفضل ازود فى النصيحة لحد ما يتبعها او يدينى بالقلم ايهما اقرب ....

انا حعلم نفسى ما ازعلش لو حد قالى الكلمة دى لانى حبقى متـأكدة ان انا حفضل انصح وهو حيتفبل النصيحة شاء ..ام أبى..

الخلاصة يا سادة ....

كلنا لينا من بعض ..انت مش عايش لوحدك وربنا مش خلقك لوحدك..فيا تتقبل النقد ..يا تتكتم خالص وبلاش "ملكوش دعوة" اللى انت معلق عليها دى..اصل الحق ما يزعلش حد

 http://ask.fm/MayaShalabie  

#لكى_الله_ياغزة

كنت ناوية النهاردة اكتب عن موضوع تانى خالص بس الظروف اللى حوالينا بتجبرك انك متفكرش فى حاجة

قريت من شوية ان وصل عدد الشهداء فى غزة الى اكثر من 100 شهيد واغلبهم من الاطفال

اللى بيحصل فى غزة دا بسببنا احنا ..ايوة احنا ...طول عمرنا عايشين وساكتين ومش عارفة حنفضل لحد امتى كدا ؟؟؟؟ 

النت مليان صورلبيوت محروقة واطفال مقتولة ومناظر بشعة وللاسف محدش بيتحرك ولا بيعمل حاجة..

لا حكومة بتساعد ولا جيش بيتحرك ولا حد بيعارض ...فين داعش وصوتها العالى واللى عملته خليفة المسلمين ؟؟فين حماس ؟؟ فين السعودية بلد الاسلام ؟ احنا فين؟؟؟؟ مسافة السكة فين ؟؟ها؟؟

لا انا ولا انت حنقدر نعمل حاجة لوحدنا ..

ممكن كل اللى نقدر نعمله ان احنا ندعيلهم يثبتهم الله على الحق ويرحم امواتهم ويشفى جرحاهم...

 وانا بقول كدا لان فى ناس بقى عندها تبلد فى المشاعر..تحس ان الانسانية ماتت منها على اساس ان احنا مش حنموت موتتهم..

#لكى_الله_ياغزة

#حسبى_الله_ونعم_الوكيل