ليه كل حاجة حلوة عمرها قصير؟؟؟

كل حاجة حلوة عمرها قصير....

الكلام دا مش حقيقى

كل حاجة ليها عمرها الافتراضى يعنى مفيش حاجة عمرها قصير انت بس اللى بتندمج شوية فى اللحظات الحلوة وبتنسى تبص فى الساعة...

احنا بس بنحاول نقنع نفسنا بعبارة غريبة لا ليها اصل ولا فصل مع ان الحاجات الحلوة لوعشتها حتفضل معاك طول حياتك فى دماغك وفكرك وحياتك.....

دا اللى بيخليك مبحلق فى السقف بالليل بتفتكر اى حاجة عدلة فى حياتك عشتها او راحت منك وما عشتهاش بس حاببها ...

وخليك دايما ملاحظ نفسك يعنى لو لقيت نفسك فى لحظة حلوة اوعى تخليها تعدى من غير ما تعملها save  فى دماغك وحس بكل فسوة بتعدى منها ....

اما بقى اللحظة الغبية اللى بتكون فيها مضايق ومخنوق من نفسك دى ما بتاخدش غير وقتها وحتى بعد ما بتعدى وتيجى تفكر فيها بتكون فرصة تحمد ربنا انها مش جاية تانى وبالمرة اعملها Delete من حياتك كلها

وفى الاخر ....

حاول تفكر فى كل حاجة حلوة حصلتلك او بتحصلك او حتحصلك او نفسك تحصلك بس عمرها ما حتحصلك وحتلاقى نفسك بتبتسم او بتضحك بصوت عالى ..احمم بس يا ريت مش قدام حد عشان ما تروحش على مستشفى المجانين بدرى بدرى ...

Don't cry because it's over. Smile because it happened "Dr.suess"

الابرة اللى فى كومة القش

الابرة اللى فى كومة القش .....

المثل دا الناس بتستخدمه تعبيرا عن الاستحالة وعدم الامكانية الا انه فى رأيى حاجة تانية خالص

تخيل كل واحد فينا بتيجى عليه لحظات معينة ويبقى شبه كومة القش والابرة اللى جواك هى ببساطة:

حتة الانسانية والضعف اللى جواك وانت بتفترى على حد ....

القوة اللى جواك وانت حاسس بالضعف....

الحاجة اللى بتحسسك انك ليك قيمة فى الدنيا فى الوقت اللى بتبقى حاسس فيه انك ملكش لازمة....

ما تدورش كتير على الابرة لانك عمرك ما حتلاقيها ...لكن دور على المغناطيس اللى حيطلعهالك ....

والمغناطيس هو الشخص-ايا كان صديق او حبيب او قريب- اللى حيحسسك بالقوة لما تضعف ...حيحسسك بانسانيتك لما تفترى وتقوى ....حيحسسك بذاتك اما تنكرها...

يعنى من الاخر ...

       حيلاقى الابرة.....

وطالما انت عايز الابرة ...حتلاقى المغناطيس...

بس الله يكرمك.. ما ترميش القش......

الحمد لله

       فلا تغرنك الحياة الدنيا وزينتها                   وانظر الى فعلها فى الاهل والوطن

وانظر الى من حوى الدنيا باجمعها              هل راح منها بغير الزاد والكفن

خذ القناعة من دنياك وارض بها                 لو لم يكن لك منها الا راحة البدن

يا نفس كفى عن العصيان واكتسبى              فعلا جميلا لعل الله يرحمنى

(الابيات دى قرتها فى كتاب اسمه" البحر الرائق" )

كتير مننا ما عندوش القناعة والرضا بحاله...

كتير مننا بيقول" الحمد لله" بلسانه بس مش بقلبه..

كتير مننا لحد دلوقتى كلمة "اشمعنى؟؟"..."ليه هو اه وانا لا؟؟" ما بتفارقش لسانه..

بص للابيات المكتوبة وحتعرف ان كل اللى حواليك ولا حاجة

ما تحاولش تقنع نفسك بوهم زائل وحجج باطلة وتبقى كدا عايش فى الدنيا مستريح....

قول الحمد لله بس يا ريت من قلبك               

بص على نص الكوباية الفاضى

للاسف اسرع حاجة بتروح من ايديك هى احلامك مع انها ابطأ حاجة بتيجى لحد عندك وساعات ما بتجيش..........

 ومش كدا وبس.. دى كمان بتختلف سرعتها على حسب شدة حاجتنا ليها

....يعنى بتبقى بسرعة البرق لو الموضوع متعلق بحياتك المهنية 

 الا ان بعد ما حلمك بيضيع من ايديك اغبى جملة ممكن تتقالك هى بص لنص الكوباية المليان

 وبالنسبة لمعظمنا ما بتبقاش فيه كوباية اساسا عشان يبصلها

بس عارفين ده معناه ايه معناها ان لسة كوبايتك مليانة وعشان كدا ما تمليهاش تانى

لأ......امليها لحد اخرها وافضل احلم وفكر ودوس فى الحلم اوى كمان .....واعرف ان 

كوبايتك كبيرة اوى-تشيل لترين تلاتة- يعنى

 و"بص على نص الكوباية الفاضى "...واعرف ان طول ما النص دا فاضى فانت عندك فرصة تمليها وتمليها -بس امليها حاجة عدلة الله يكرمك- واعرف ان عمر ما الكوباية حتتملى لاخرها ومش حيبقى فيه مكان فاضى لاكتر واكتر... ودا طبعا لانك دايما عطشان

Staring at the bottom of your glassHoping one day you'll make a dream lastBut dreams come slow and they go so fast                "let her go-passenger"

السعادة

اما تحس بسعادة اهلك واخواتك وتلاقيهم بيضحكوا بتحس احساس غريب وكأنك واحد تانى تماما- ومحدش يقولى انت مش انت وانت جعان- ودا شعور جميل عمرك ما حتلاقى زيه فى اى حتة او عند اى حد...انك تشوف عيونهم وهى فرحانة وبتضحك على اى حاجة....تشوف فرحتهم وبسمتهم وتعرف انك عمرك ما حتشوف الضحكة دى على وش اى حد تانى-وعلى ضمانتى يا سيدى-.....تشوف ضحكة عالية منهم تنسيك الدنيا واللى فيها .....تشوف ناس لا همها مطامع ولا فى نفسها كره لبعضها.....اوعى تنشغل فى يوم عنهم ولا تبعد...حاول تضحكهم وتبسطهمبوس راس امك وابوك واعرف انك ملاقيتش... ومش لاقى ....ومش حتلاقى حد زيهمفضفض مع اخواتك واضحك فى وشهموخليك فاكر مش حتلاقى حاجة فى حياتك احلى واجمل من انك تشوف عيلتك سعيدة  When you look at your life, the greatest happinesses are family happinesses. ~Joyce Brothers 

الهبل عمانى ورب العرش نجانى

وعلى عادتى هبلة زى ما انا- بس محدش يشتمنى انا اشتم نفسى بس- بحب اشوف الكون من وجهة نظر بعيدة شوية لا بعيدة حبتين

دا انا بس على كبر شوية

فدى مقتطفات من هبلى...اااااا....قصدى من استنتجاتى العبقرية فى الكون :

لو بتصدق فى وجود كائنات فضائية ... او عوالم اخرى

اطمن .....

لان انا من كبار المؤمنين بوجودهم ودا على عكس ناس كتير ولو سألتنى ليه مش حعرف ارد الصراحة بس يعنى تبقى الكرة الارضية عبارة عن نقطة فى المحيط بالنسبة للمجرة دا غير وجود مجرات تانية وتقولى مفيش اى كائن اخر عايش هناك

طب لو كانوا موجودين كان حيبقى شكلهم عامل ازاى؟؟؟

طب هما حيتحاسبوا فى الاخرة معانا؟؟

طب بيكلوا البيض مقلى ولا مسلوق؟؟

انا بدعى ربنا تكون الكائنات الفضائية موجودة ...على الاقل الحياة حتبقى فيها شوية اكشن

**************************************

وتانى موضوع مهم اوى طبعا هو ...طعم الشمس

عمرك جربت طعمها؟؟....طب ما تجرب ...ايوا جرب

جرب وانت واقف فى جو مشمس والعصافير تزقزق من حولك تلحس شوية اشعة شمس عارف حيبقى طعمها ايه؟؟

طعمها شبه طعم الجبنة ...جرب وحتشوف وحتفتكرنى

بس لو اللى ما نفعتش معاه يقول عشان كدا حيبقى عندك خلل ما ولازم تروح تكشف على المخ

OLD

مش حتبقى حاجة غريبة لو فضلت ماشى فى الشارع وانت باصص فى وشوش الناس او على البيوت القديمة

بالنسبة ليا الخطوط الموجودة على وشوش كبار السن دى مش عجز ولا حاجة دى حكايات وقصص وكل ماكترت الخطوط اعرف ان الانسان دا عنده حكايات ياما مخبيها....

يعنى العيون مثلا....حتلاقى اللى عينيه فرحانه وبتضحك وحتلاقى اللى عينيه كلها حزن وغم ...محدش يقولى كل واحد فى حاله ...لا ....جرب تخلى واحد حزين يبتسم او حد فرحان وبيضحك اضحك معاه مش حيحصل حاجة يعنى ....

اما بقى البيوت ...فحتلاقى ان كل بيت مخبى اللى جواه مش عايزك تشوف حاجة فيه .....رغم ان فضولى بيقتلنى فى اوقات كتير اعرف ايه اللى جواه ...هل جواه بسيط ؟؟ولا متبهرج ومتزين وفى كل حتة فى انتيكة ؟؟؟

وكل ما البيت بيقدم ويعجز كل ما فضولك بيزيد اكتر واكتر ...

وانت ماشى حاول تدقق فى اى حاجة ..صغيرة او كبيرة...حتلاقى نفسك بتنبسط ساعات وحتلاقى نفسك بتحزن كتير

حاول انك تقدر اللى قدامك وتديله قيمته ...

قدر تتقدر.....