التفكير فى اللامعقول

كلنا بنفكر...وكلنا بنتمنى حاجات غريبة عمرها ما حتحصل او ممكن تحصل بس على بعد ملايين السنين الضوئية J

يعنى قبل ما تنام بليل تفضل مبحلق فى السقف برضو-ما تفهمش ايه علاقة السقف بالافكار"سبحان الله"-بتفضل تفكر فى شخص معين بتحبه –او مش طايقه- او ممكن تفكر فى منصب عالى-عالى عالى يعنى- ممكن توصله بس بعد ما تقوم الحرب العالمية الرابعة باذن الله :P

ولو بتسأل نفسك كتير انت ليه بتفكر كدا فدا حيكون اجابته "الامتاع الذهنى"...يعنى الخمس دقايق قبل ما تغوص فى النوم او الساعتين اللى بتفضل ماشيهم فى صالة البيت رايح جاى والنور مقطوع والنت فاصل بتبقى احيانا اجمل لحظات حياتك .....

مع العلم ان احنا برضو بنفكر فى حاجات معقولة بنفكرفى مستقبل....فى شغل...فى دين...فى دنيا..فى علم...فى حياة....

يعنى محدش يستغل الكلمتين المكتوبين فوق ويعوم فى اللامعقول ويسيب ارض المعقول ...

واحب اقول كلمتين ع الماشى ان :

مفيش حد مش بيفكر...مفيش حد مش بيتمنى

كلنا بنفكر فى كل حاجة وبنتمنى كل حاجة وربنا بيحطلنا الاصلح فى حياتنا فاعمل اللى عليك وسيب الباقى على ربنا...

ملحوظة صغيرة...

الكلام دا ن تجربة حياتية يعنى انا برضو بفكر فى اللامعقول...انا نفسى ابقى رائدة فضاء مع ان انا بخاف جدا من المرتفعات ....نفسى اركب موتوسيكل بسرعة جنونية بس اكون لابسة الخوذة-الواحد مش ضامن عمره برضو-.....نفسى ابقى جراحة مشهورة اوى بس ساعتها يكون عندى عشرين سنة بس ما تفهمش ازاى...ونفسى...ونفسى....ونفسى......

الصاحب اللى تتمسك بيه والصاحب اللى ترميه فى مدونتك

بناء على طلب الجماهير الحاشدة انا قررت اكتب الموضوع دا .....اااااااا......احم .....هو الصراحة شخص واحد على ask.fm اللى طلب الموضوع دا J

فى نظرى الصاحب اللى تتمسك بيه هو الصاحب اللى يحكيلك عن اى حاجة فى حياتة او مع عيلته من غير ما يتكسف منك او يحس بخجل وفى نفس الوقت انت تقدر تقوله على اسرارك اللى فى حياتك من غير ما تحس انك متضايق او متوتر من ردة فعله ومش حتندم على حاجة عملتها معاه او قولتهاله يعنى يكون واحد ترتاح معاه ويرتاح معاك ....

هوالصاحب اللى يقولك عن مشاكله بهدف طلب حل او بهدف الفضفضة مش زى بعض الناس اللى يحسسوك انهم بيحكولك مشاكلهم عشان يبينوا ان حياتك احسن من حياتهم وانهم-يا عينى-شايفين الذل على اخره........

اما بقى الصاحب اللى حترميه فى مدونتك فهو اكيد شخص انت بتهتم بيه -لان غير كدا دا يبقى مش صاحبك اساسا-ونفسك هو يستجيب لنصايحك عشان انت نفسك يبقى انسان احسن من اللى انت شايفه.... نفسك ترتاح معاه وانت بتكلمه ويستريح معاك وهو بيكلمك فبتضطر ترميه فى اقرب مدونة عندك بس للاسف مبيفهمش برضو.....

دا كان رأى بسيط عن الموضوع دا واتمنى يعجب اللى طلبه واللى عايز اى موضوع اكتب عنه يبعتلى على http://ask.fm/MayaShalabie بس يا ريت بلاش مواضيع صعبة ..دا انا غلباااااااااااااااااانة L

فضفضة قصيرة

وانا قاعدة بقرأ سورة الكهف لفتتنى اية بتقول:"قل هل ننبئكم بالاخسرين اعمالا, الذين ضل سعيهم فى الحياة الدنيا وهم يحسبون انهم يحسنون صنعا"

هل من الممكن ان الاية دى بتتكلم عليا او عليكى او عليك ...يعنى الواحد شايف نفسه انه كدا ماشى على الطريق الصحيح فى الدنيا بس فى نفس الوقت اما تفكر فيها الواحد طول حياته معملش حاجة عدلة  .....

يعنى مثلا رمضان هو الشهر الوحيد اللى الواحد بيختم فيه القران ...طيب نفرض لو معشناش لاخرة رمضان ؟؟؟انا شايفاها عيب اوى علينا ...مننظرنا sorry  اوى
دا بصراحة اللى كان خانقنى
وقولت افضفض بدل ما كل الناس بتفضفضلى وانا مش بفضفض لحد

"اللهم انك عفو تحب العفو فاعفو عنا واغفر لنا"

ليه كل حاجة حلوة عمرها قصير؟؟؟

كل حاجة حلوة عمرها قصير....

الكلام دا مش حقيقى

كل حاجة ليها عمرها الافتراضى يعنى مفيش حاجة عمرها قصير انت بس اللى بتندمج شوية فى اللحظات الحلوة وبتنسى تبص فى الساعة...

احنا بس بنحاول نقنع نفسنا بعبارة غريبة لا ليها اصل ولا فصل مع ان الحاجات الحلوة لوعشتها حتفضل معاك طول حياتك فى دماغك وفكرك وحياتك.....

دا اللى بيخليك مبحلق فى السقف بالليل بتفتكر اى حاجة عدلة فى حياتك عشتها او راحت منك وما عشتهاش بس حاببها ...

وخليك دايما ملاحظ نفسك يعنى لو لقيت نفسك فى لحظة حلوة اوعى تخليها تعدى من غير ما تعملها save  فى دماغك وحس بكل فسوة بتعدى منها ....

اما بقى اللحظة الغبية اللى بتكون فيها مضايق ومخنوق من نفسك دى ما بتاخدش غير وقتها وحتى بعد ما بتعدى وتيجى تفكر فيها بتكون فرصة تحمد ربنا انها مش جاية تانى وبالمرة اعملها Delete من حياتك كلها

وفى الاخر ....

حاول تفكر فى كل حاجة حلوة حصلتلك او بتحصلك او حتحصلك او نفسك تحصلك بس عمرها ما حتحصلك وحتلاقى نفسك بتبتسم او بتضحك بصوت عالى ..احمم بس يا ريت مش قدام حد عشان ما تروحش على مستشفى المجانين بدرى بدرى ...

Don't cry because it's over. Smile because it happened "Dr.suess"

الابرة اللى فى كومة القش

الابرة اللى فى كومة القش .....

المثل دا الناس بتستخدمه تعبيرا عن الاستحالة وعدم الامكانية الا انه فى رأيى حاجة تانية خالص

تخيل كل واحد فينا بتيجى عليه لحظات معينة ويبقى شبه كومة القش والابرة اللى جواك هى ببساطة:

حتة الانسانية والضعف اللى جواك وانت بتفترى على حد ....

القوة اللى جواك وانت حاسس بالضعف....

الحاجة اللى بتحسسك انك ليك قيمة فى الدنيا فى الوقت اللى بتبقى حاسس فيه انك ملكش لازمة....

ما تدورش كتير على الابرة لانك عمرك ما حتلاقيها ...لكن دور على المغناطيس اللى حيطلعهالك ....

والمغناطيس هو الشخص-ايا كان صديق او حبيب او قريب- اللى حيحسسك بالقوة لما تضعف ...حيحسسك بانسانيتك لما تفترى وتقوى ....حيحسسك بذاتك اما تنكرها...

يعنى من الاخر ...

       حيلاقى الابرة.....

وطالما انت عايز الابرة ...حتلاقى المغناطيس...

بس الله يكرمك.. ما ترميش القش......

الحمد لله

       فلا تغرنك الحياة الدنيا وزينتها                   وانظر الى فعلها فى الاهل والوطن

وانظر الى من حوى الدنيا باجمعها              هل راح منها بغير الزاد والكفن

خذ القناعة من دنياك وارض بها                 لو لم يكن لك منها الا راحة البدن

يا نفس كفى عن العصيان واكتسبى              فعلا جميلا لعل الله يرحمنى

(الابيات دى قرتها فى كتاب اسمه" البحر الرائق" )

كتير مننا ما عندوش القناعة والرضا بحاله...

كتير مننا بيقول" الحمد لله" بلسانه بس مش بقلبه..

كتير مننا لحد دلوقتى كلمة "اشمعنى؟؟"..."ليه هو اه وانا لا؟؟" ما بتفارقش لسانه..

بص للابيات المكتوبة وحتعرف ان كل اللى حواليك ولا حاجة

ما تحاولش تقنع نفسك بوهم زائل وحجج باطلة وتبقى كدا عايش فى الدنيا مستريح....

قول الحمد لله بس يا ريت من قلبك               

بص على نص الكوباية الفاضى

للاسف اسرع حاجة بتروح من ايديك هى احلامك مع انها ابطأ حاجة بتيجى لحد عندك وساعات ما بتجيش..........

 ومش كدا وبس.. دى كمان بتختلف سرعتها على حسب شدة حاجتنا ليها

....يعنى بتبقى بسرعة البرق لو الموضوع متعلق بحياتك المهنية 

 الا ان بعد ما حلمك بيضيع من ايديك اغبى جملة ممكن تتقالك هى بص لنص الكوباية المليان

 وبالنسبة لمعظمنا ما بتبقاش فيه كوباية اساسا عشان يبصلها

بس عارفين ده معناه ايه معناها ان لسة كوبايتك مليانة وعشان كدا ما تمليهاش تانى

لأ......امليها لحد اخرها وافضل احلم وفكر ودوس فى الحلم اوى كمان .....واعرف ان 

كوبايتك كبيرة اوى-تشيل لترين تلاتة- يعنى

 و"بص على نص الكوباية الفاضى "...واعرف ان طول ما النص دا فاضى فانت عندك فرصة تمليها وتمليها -بس امليها حاجة عدلة الله يكرمك- واعرف ان عمر ما الكوباية حتتملى لاخرها ومش حيبقى فيه مكان فاضى لاكتر واكتر... ودا طبعا لانك دايما عطشان

Staring at the bottom of your glassHoping one day you'll make a dream lastBut dreams come slow and they go so fast                "let her go-passenger"